alea.eus

Ikerketa abiatuko dute udalek Arakil ibaian jazotako isuriak argitzeko

Erredakzioa 2018-10-31 17:06   Ingurumena  Lautada

Goizean bildu dira Donemiliaga eta Asparreneko alkateak Zadorra Bizirik plataformako kideekin arazoa aztertzeko.

Ikerketa abiatuko dute udalek Arakil ibaian jazotako isuriak argitzeko
Okiturriko industrialdean egon daiteke arazoa. | Ikusi handiago | Argazki originala

Asparrena eta Donemiliagako udalek ikerketa abiatuko dute Arakil ibaian jazo diren isurien jatorria argitzeko; aste honetan bertan Zadorra Bizirik plataformak salatu du hidrokarburoen isuri bat gertatu zela Amezaga eta Arakil ibaien artean. URAk azaldu zuen isuri txikia zela eta ez zituela kalte larririk ekarri.

Bada, gaur goizean bildu dira Donemiliaga eta Asparreneko alkateak Zadorra Bizirik plataformako kideekin gaia aztertzeko. Txelo Auzmendi Asparreneko alkateak ALEAri azaldu dionez, udalek badakite arazo bat dagoela bi udalerriek partekatzen duten industrialdean dagoen euri-uren kolektorearekin, eta aitortu du orain arte ez diotela arazoari behar bezala aurre egin.

Izan ere, Auzmendiren esanetan, URAk ez dio garrantzirik eman isurketari, eta orain arte Udalak jaso duen salaketa eta informazio bakarra Zadorra Bizirik plataformak helarazitakoa izan da. "Haiei esker ikusten ari gara arazo bat dugula, eta neurriak hartuko ditugu".

Hurrengo astean bilduko dira berriro alkateak eta Zadorra Bizirik Plataformako kideak teknikoekin isurketa nondik datorren ikertzeko. Dena den, Asparreneko alkateak argitu nahi izan du industrialdea eta batez ere "susmagarriak" izan daitezkeen enpresak Donemiliagan daudela.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Izan zaitez ALEAkide.



Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa