Lanpostuak galtzeko arriskuaz ohartarazi dute Aldanondoko langileek

Lanpostuak galtzeko arriskuaz ohartarazi dute Aldanondoko langileek
Aldanondoko langileek kontzentrazioa egin dute.

Enpresak ez du ziurtatu Aguraingo planta errea berriro zabalduko duela.

Joan den abuztuaren 13an Aldanondo enpresak Agurainen duen lantegia kiskali zuen sutearen ondoren, enpresak kontratuen urte bateko etenaldiko eta iraungitzeko erregulazio txostena ezartzeko prozesua hasi duela salatu du LAB sindikatuak. 27 behargin zeuden lanean Aldanondo fabrikan hura erre aurretik. Horietatik zazpi kalera joango lirateke, iturri sindikalen arabera, eta beste hamabost urtebeteko erregulazioan sartuko lirateke, "itzultzeko inolako bermerik gabe". 

LAB sindikatuak langileak pairatzen ari diren "ziurgabetasuna" salatu du ohar baten bidez: "Enpresako ordezkariek bideragarritasuna bermatu gabe jarraitzen dute, eta instalazioaren balizko berreraikitzeari ez diote data zehatzik jartzen". Sindikatuaren esanetan, gainera, enpresarekin egindako bilera guztietan, "oinarri eta konpromisorik gabeko promesak bakarrik" jarri dituzte mahai gainean.

Hori dela eta, Aguraingo udaletxearen aurrean elkarretaratzea egingo dute, bihar, 10:00etan.

 

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide