Zadorra ez kutsatzeko, ur-araztegi berria eraikiko dute Agurainen

Kutsadura handia jasan du ibaiak azken hilabeteetan, enpresen isurketengatik eta araztegi zaharraren akatsengatik

Puntu beltza da Zadorra ibaiaren Aguraingo zatia: azken hilabeteetan, ura behin eta berriz agertu da kutsatuta; gehienetan, apar-zuriz beteta. Arazoari konponbidea emateko, hitzarmena sinatu dute aste honetan erakundeek: 2020rako, ur-araztegi berria eraikiko dute Galzar industriagunean, zazpi milioitan aurreikusita.  

Arabako Foru Aldundiak, Uraren Euskal Agentziak eta Aguraingo Udalak sinatu zuten asteartean lankidetza-hitzarmen berria. Izan ere, azken urteetan kutsadura handia jasan du Zadorra ibaiak Arabako Lautadan. Batetik, arauz-kanpoko ur-isurketa ugari egin dituzte Agurain inguruko enpresa batzuek, hondakin-urak aurrez tratatu gabe bota baitituzte errekara, tartean Aldanondo esneki-enpresak eta Celigüeta snack-egileak. Bestetik, arazo ugari eman ditu ur-araztegiak, zaharkituta gelditu baita 80. hamarkadako azpiegitura. Hala aitortzen du, bere neurri programan, Ebroko Demarkazio Hidrografikoko Plan Hidrologikoak (2015-2021). 

Adituen dokumentuak jasotzen duenez, gaur egungo araztegia ez da nahikoa halako oinarrizko zerbitzu bat berme guztiekin emateko. Hori dela eta, bi-hiru urte barru egitura berria irekitzeko konpromisoa hartu du URA agentziak. Ordura arte, Udalak isurketa-araudia betearazi beharko du, eta uren saneamendu eta arazketa  bermatu. 

Araban, partzuergo berria

Diputazioari dagokionez, ur-partzuergo berri bat sortuko du Araba osorako; aurreratu dutenez, herriak boluntarioki atxiki ahal izango zaizkio erakunde horri. 

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide