Saskia hartu eta onddoak biltzeko garaia da udazkena. Baina behar bezala ezagutzen al dituzte onddozaleek saskiratzen dutena? Zizak ezagutu eta arriskutsuak baztertzeko, bisitaldi mikologikoak antolatu ditu Arabako Aldundiak Asparrenean.
Onddo batzuk eta besteak bereiztea ez da lan erraza izaten askotan, eta beharra errazteko bisitaldiak antolatu ditu Aldundiak, aditu baten laguntzarekin. Urriko eta azaroko igande guztietan antolatu dituzte bisitaldiak, Aizkorri-Aratz inguruetan. Hasiera batean norberak egingo du onddo bilketa saio hauetan, eta ostean kide guztiak elkartu eta aztertuko dute jasotakoa. Hala jakingo dute mendizaleek zeintzuk diren jangarriak eta zeintzuk ez, adituaren azalpenei esker. 10:00etan hasi eta 13:00etara arte izango dira saioak, dohainik.
Bisitaldiak Aizkorri-Aratz parketxetik abiatuko dira, igandero. Aurretik, baina, izena eman beharko dute parte hartu nahi dutenek; 688 629 932 eta 646 478 812 telefonoetan, edota parketxe.aizkorriaratz@gmail.com helbidearen bitartez egin daiteke.
Neurrian
Ildo beretik, Aldunditik gogoratu dute "neurrian" hartu behar direla onddoak, eta ohartarazi dute pertsona bakoitzak eguneko, gehienez, bi kilo har ditzakeela; halaber, onddoak zurtoinetik moztu behar direla gogoratu dute.