Zerk errotzen gaitu toki baten?

Erabiltzailearen aurpegia

Unai Villalba

 

Gai garrantzitsuak periodikoetan azken egunotan, eta nik uda buruan. Lan erreformak eragindako lan hitzarmenen galera, soldaten jaitsiera orokorrak, Bárcenas eta PP-ren korrupzioa, Snowden, Egipto, Garoña, Trebiñu, Euskal Herriko prozesua, epaiketak eta politikak… Munduak aurrera darrai, batzuetan okerrera agian, eta ni geldirik, udako beroaren eraginez ezin mugi. Gai garrantzitsu horietaz idatzi beharko nuke oraingoan, zuek horietaz ere pentsatu, irakurri, idatzi, eta eragin, baina nik behintzat gaur gogorik ez. Nik udako nagia buruan. Zuek zer?

Oraintxe bertan beste toki baten egon nahiko nuke, animali migratzailea nahiko nuke izan, edo haratago, nomada izaerakoa. Udaberrian bidaian hasia izan banintz, non egongo ote nintzake orain udan? Akaso hobe dut buelta askorik ematen ez badiot, nahasiak ditut barrenak eta, hemen nago eta listo. Baina eta zerk errotu nau hemen?


Sorterria, familia-bikotea, lagunak, lana, etxea, kultura, paisaiak, bizi-kalitatea, ezjakintasunak, beldurrek… hainbat faktore eta bizi-esperientziek hemen utzi gaituzte (oraingoz?). Krisiak hainbat lagun beste nonbaiten sustraiak ezartzera bultzatuko al ditu? Sustrai finak izango al dira behin eta berriro aldatu ditzaten? Zelakoak dira sustrai aldakorrak dituzten pertsonak?


Ai-ai-ai, udak ez dit gehiago pentsatzen ez eta idazten uzten. Zuek aspertu baino lehen, udaren lehenengo aste hauetan Gasteizen gustatzen zaizkidan bi gauza kontatuko dizkizuet: auzoetako jaiak eta Jazzaharrean. Kalean egon, musika entzun, dantzatu, ekimen autogestionatuak neurri desberdinetan… Zuek guztientzako ezagunak, ezer berririk ez. Eta bueno, ez dira nahikoak hiri honetan errorik botatzeko, baina hemen gaudenez gero… Elkar ikusiko al dugu baten edo bestean?

 


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide