Aniztasunean euskaraz bizitzeko aldarria egin zuten larunbatean Antzuolan 4. Auzoko jaian

Erabiltzailearen aurpegia Topagunea 2017ko mai. 8a, 10:25
Auzoko egitasmoa martxan duten herrietako parte hartzaileen bilgune eta herriz herri egiten ari diren lanaren lekuko izan zen Antzuolako plaza larunbatean. Jatorri ezberdinetako herritarrek, bizi dugun aniztasuna kontuan hartuz euskaraz bizitzeko borondatea erakutsi zuten jaira gerturatu ziren antzuolarren eta debagoiendarren babesarekin.

Jaiari hasiera emateko, ongi etorri ekitaldia burutu zuten herriko plazan. Idoia Ramirez Antzuolako auzokoko dinamizatzaileak egin zuen ongietorria eta jarraian Elena Laka Euskaltzaleen Topaguneko lehendakariari eman zion hitza. Ondoren Ion Iturbe Antzuolako zinegotziak hartu zuen hitza eta eta jarraian Auzoko egitasmoa martxan duten hainbat herrietako parte hartzaileek, beren jatorrizko hizkuntzan eta euskaraz eman zieten ongi etorria bertaratutako guztiei.

Plaza guztia jolasean jarri zuten ondoren. Taldeka banatu zituzten Auzokoko dinamizatzaileek bertaratuak eta elkarrekin jolasean aritu ziren euskaraz dakitenak eta hizkuntzara gerturatzen ari direnak.

Jatorri ezberdinetako janari dastatzea egin zuten ondoren plazan bertan, Auzokon parte hartzen duten kideek prestatutako plater bereziekin eta jaiari amaiera emateko Antzuolako Oinarin dantza taldeko kideek polka dantzatzen erakutsi ziguten eta  Arantza Iglesiasek  berriz dantza afrikarrak.

 

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide