Begoña Pedrosak maiatzaren 30ean iritzi zutabe batean Eusko Jaurlaritzaren konpromisoa eta erantzukizuna goraipatu zituen, baita hezkuntzak egungo gizartean duen garrantzia ere. Lerro batzuk idatzi bai, baina asteburuan ez du negoziatzeko inolako borondaterik izan, Steilas sindikatuak prestutasuna adierazi zuen arren.
Konpromisoa ekintzekin erakusten da eta ez hitzekin. Ekintzek, aldiz, zera diote: jarraipen batzordearen batzarra bertan behera utzi eta grebak deskonbokatzea eskatzen duela Eusko Jaurlaritzak, inolako bermerik eman gabe. Iritzi zutabeak idatzi ordez negoziatzen egon izan balira, baliteke oso bestelakoa izatea egungo egoera. Astelehenean gertatzen dena gertatzen dela, onartezina da aurreko asteko egoera berera itzultzea. Negoziazioak ezin dira azken unerako utzi, milaka familia eta irakasle erabakitzen denaren menpe baikaude. Pasaden astelehenean, zer gertatuko zen jakin gabe oheratu ginen eta goizean goiz eduki genuen bileraren nondik norakoen berri. Ez zaie gehiegi axola, antza. Izan ere, azken unerako utzi dute negoziazioa oraingoan ere.
Iritzi zutabeak idatzi ordez negoziatzen egon izan balira, baliteke oso bestelakoa izatea egungo egoera
Familia eta irakasleok nazkaturik gaude hitz polit eta promesa faltsuez, egoera oso bestelakoa da eta. Euskal Eskola Publikoko gelak ixten eta eskolak fusionatzen ari dira, burokraziaz gainezka gaude,15 urte daramatzagu hitzarmen barik, ez dago euskara edo berdintasun planik, ez digute azterketa medikurik egiten... Ez da jaiotza tasaren jaitsiera ratioak jaitsi eta arreta hobea eskaintzeko probesten ari, murrizketak betikotzeko baizik. Ordezkoen baldintzek okerrera egin dute nabarmen, erretiratu behar direnenek zer esanik ez... Eta egoera guzti honen aurrean, greba "justifikatu gabekoa" dela eta "hezkuntza sistematik kanpoko interesei" erantzuten diela entzun dugu, azal lodia izan behar da gero!
"Autonomiaz jarduteko, espiritu kritikoz moldatzeko eta erabakiak hartzeko behar diren funtsezko gaitasunak eskuratzen dituzte ikasleek eskolan". Ez dira nire hitzak, Begoña Pedrosa sailburuarenak baizik. Oraingoan arrazoia eman beharra diot, baina espiritu kritiko hori ere irakasleok izan behar dugu, ezin baitugu ahaztu gaur egun ditugun eskubideak borrokatzen irabazi zirela. Ondo legoke gure lankide eskirolei gogoraraztea egun normaltzat ditugun eskubide asko (ordezkapenak lehen egunetik, bajan %100 kobratzea, 3 urteko irakasle gehiago...) aurreko greba zikloan erdietsi zirela. Espiritu kritikoa dugulako ere, kezkaz ikusten dugu gobernuak EiTBko albisteak nola manipulatzen dituen, gure borroka behin eta berriro isilaraziz (akordioa lortu zitekeen egunean izan ezik). Hau ote da sailburuak sinesten duen "erantzukidetasun-eredua"?
Aipaturiko guztiagatik, eta akordioa lortu zein ez, borrokan jarraituko dugu kalitatezko euskal eskola publikoaren alde. Egiten dugunean sinisten dugulako eta egiten duguna maite dugulako. Hitzetatik ekintzetara pasatzeko ordua iritsi da.
Gora Euskal Eskola Publikoa!
Mitxel Elortza.
Iritzi artikulu hau argitaratzean, ALEAk ez ditu bere gain hartzen egileak adierazitako iritziak, ezta horiekin lotutako erantzukizunak. Zure iritzia bidali nahi baduzu, idatzi erredakzioa@alea.eus helbide elektronikora.