Tira, eszena kitsch samarra, zer egingo zaio. Baina ba ote nahikoa amu konparaziorako. Zeren eta Gasteizetik Aramaiora autoan irteten garen bakoitzean, Betoñon (irten bakarrik, sartu Gamarratik egiten baikara, halakoxeak gara gu), ezkerretara begiratu, eta beste eraikin huts bat ikusten baitugu, zeina ez dagoen sasiak janda, basati beltzean, erdi jausita. Eta zeinak bere hormetan “jasan” zuen 18 milioi euroko inbertsio puska bat, aurpegia garbitu, erraiak birmoldatu eta kultura eta sormen proiektu txatxi bat egiteko. Eta, noski, ikusten dudanean, gizarajoa ni, ez zait bertan gaztetxeak egiteko gogoa sartzen (nahiz eta muino gainekoak eta Errekaleor inguruak agian eskertuko luketen ahizpa autogestionatu eta bizi-bizi bat, hor, extrarradioan), bere ardura dutenen aurrean protesta egiteko gogoa baizik. Beste batek ere egin zuten bere garaian protesta koloretsu bat, eta orain gure banketxe pribatizatu dohatsuaren pantomima judizial bat jasan behar izan du.
Handia baita KREA: ausart zaitez esaten siriar errefuxiatuei hor dagoela, hutsik, nork beteko zain. Handia bezain itxia: ez uztearren, inguruko belardiak zapaltzen ere ez dute uzten, hesiak (beti hesiak) jarrita. “Edozertan gastatzeko beste diru dugu” garaiaren argizarizko museoko elementu bat gehiago. Ez ahal da momifikatuko. Jendea hasi da mugitzen, Siberiar KREAzko zirkulu itxia irekitzeko. Aupa Gorka Urtaran, baliatu aukera hori.