Lokatza ikusi, lokatza garbitu

Erabiltzailearen aurpegia Manex Agirre 2015ko mar. 11a, 01:00

Manex Agirre

Hauteskundeen aurreko amiltze-arriskuak eragindakoa dela pentsa dezakegu, baina, azken asteotan erakunde publikoetako kargudunen ustelkeria kasuek egunerokoan hartu duten pisua sekulakoa da. Ezin dut burutik kendu Chihiroren bidaia eder horretako eszena ikusgarria: jainko bat, lokatzak eta zikinkeriak goitik behera bildua (usain nazkagarrizko bola erraldoi bat) iritsi da Chihiro lanean ari den jainkoen bainuetxera.

 

Bainu bat behar du, ez nolanahikoa. Lanean hasiberria den protagonistari egokituko diote garbiketa. Hasiko da gorputzean itsatsita duen lokatz artean aurkitutako sokari tiraka, eta zabortegi bat betetzeko adinako zerrikeria aterako da, zurrustan (barka bideoaren kalitate eskasa, ezin besterik aurkitu).  Ikusgarria da “garbituak”, amaieran, hartzen duen lasaitua, garbitzaileari (Chihirori) nola ordaindu asmatu ezinik erdi erotu arte.

 

(Erakargarria egin zait, betidanik, “garbitzeak” duen indar sinboliko handia. Ez ikuspegi espiritual batetik, arima garbitzearen mordoilo katolikoak usain mikaztuegia baitu. Garbiketa fisikoa, ugerra gainetik kentzea. Kontakizunek, narrazioek, historian zehar, asko erabili duten baliabidea da. Pertsona bat, etxe bat, itsasontzi bat… garbitzeak, transformazio bat dakar.)   

 

Hari mutur batetik tiraka hasi (azken finean, horrela hasten da arreta merezi duen edozer, izan istorio, izan kronika egiati) , eta kaka ekarri duten zerrendak argitaratu dituzte Araban, Nafarroan, Madrilen. San Antonio kalea, De Miguel kasua, Cabieces. HSBCko kargudun publikoak ere hor daude. Ekidinezina da pentsatzea, sektore batzuetan, modu sistematikoan jokatu dela interes pribatuaren eta norbere poltsikoaren irizpideak jarraituz. Hala egingo dut nik ere, mundu guztiak egiten duelako. “Diru publikoa” lexiaren “publiko”, adjektibo hutsal bihurtu arte.

 

Administrazioko (tokikoa izan arren) eguneroko jarduna ezagutzeko aukera dugunok, ikusi dugu asko zorroztu dela kontuhartzailetza azken urteotan. Berez, krisiak estutu ditu erakunde publikoak, eta horren eraginez jarri diote beren buruari zerga-ikuskaritzari jarraipen zehatzagoa egiteko lana. Poztuko nintzateke, interbentzioaren estutze horretan askotariko esku-hartze pribatuek ere eragina izan dutela seguru izango banu. Zalantza dut ordea.

 

Denok dakigu, garbiketaz ari garenean, zertaz ari garen: ez diruaz, noski, pertsonez baizik. Are eremu zabalagoa ere har dezake gaiak, eta aurretik izan ez zezakeen ikuspegi interesgarri bat hartu: ondasun publikoen kudeaketan instituzioek, beren lege-izaerarekin, duten papera ere zalantzan jar daiteke, ikusitakoak ikusita. Eremu publikoak, bai gizarte-mugimenduen gero eta pisu nabarmenagoaren ondorioz, bai barruan (izan) dituzten kudeatzaile ganorabako batzuek behartuta, berregituratze bat behar du. Bainuetxeak erreforma bat behar duela, alegia.

 

 

 

 

 

 

 

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide