Ardatza

Erabiltzailearen aurpegia Manex Agirre 2013ko uzt. 22a, 09:10

Manex Agirre


Egoera horietako bat, ia-ia egunerokoa, batzuontzat behintzat. Kafea hartzen ari naiz, beste pertsona batzuekin: guztira bospasei lagun izango gara. Tertulian ari gara, mahai baten bueltan. Elkar ezagutzen dugu, baina ez dago lagun minekin eduki ohi den konfiantza girorik gure artean. Eta, garrantzitsua: elkarrizketa gaztelaniaz da. Ni bakarrik naiz euskal hiztuna, koadrila honetan.

 

Bat-batean, batek besteari asteburuan zer moduz pasa duen galdetu dio. “Primeran”, erantzun dio. Oso leku politean egon dela, ez zuela aurrez ezagutzen. “Non egon zara ba?”, galdera derrigorrezkoa. “Elizondon, Baztanen”. Eta, orduan gertatu da.

Kafea hartzen ari garenotako ia lau lagunek niri begiratu didate, “Elizondo” entzun eta berehala. Bistan da ez dutela Baztan aldea ezagutzen. Baina, arrazoi bereziren batengatik (laurei batera etorri zaien arrazoi bereziren batengatik) seguru demonio daude nik ezagutzen dudala. Eta horregatik begiratu didate, interrogazio aurpegiarekin.

Bada, zer nahi duzue esatea: ni behin bakarrik egon naiz Elizondon, nire 31 urteotan. Baina, zerk lotzen nau, besteak lotzen ez dituena, Elizondorekin?

Irakasle bat baino gehiago ezagutzen ditut, bigarren hezkuntzako bere ikasleek Mikel Laboa nor den ez dakitela eta kezkatuta. Egia da: batzuontzat gure ardatzaren lehengai oinarrizko diren zenbait elementu (Baztan, Ez dok hamahiru, Xalbador) beste batzuentzat (gero eta jende gehiagorentzat) Karibea bezain exotiko dira, edo iraganeko arrasto.

 


ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide