alea.eus

Asparreneko herrietako eragileek belarriprest-ahobizi metodologia sustatuko dute

Erabiltzailearen aurpegia Lautadako Euskararen Komunitatea 2018-05-15 10:14
Asparreneko herriak martxan daude. Udalerriko 5 herritako ordezkariekin bilera egin dugu. Ahobizi-Belarriprest metodologia herri horietan nola sustatuko den zehaztu dugu. Izen emate arrakastatsu bat eta herritarrak prestatzea da helburu.
Euskaraldia 11 Egun Euskaraz ariketa soziala da, egitea du helburu. Gure hizkuntza portaerak erdaratik euskarara aldatzera goaz: Ahobiziek euskarari eutsi beharko diote ezohizko egoeretan (elkarrizketa elebidunak) eta Belarriprestek adierazi behar dute prest daudela euskaraz ulertzeko edozein egoeratan, aukera emanez euskaraz hitz egin nahi dutenei. Txapekin identifikatzeak asko lagunduko digu.

Herritarrei beren hizkuntza portaerak aldatzeko bi ekintza egitea proposatuko zaie: lehenengo, izena eman beharko dute azaroaren 23a baino lehen, eta, bigarrena, Ahobizi-Belarriprest rolek daramatzaten hizkuntza portaerak plazaratu beharko dituzte 11 egunetan zehar. Hortxe lanerako eta ekimena diseinatzeko bi ipar-orratz.

Asparreneko udalerrian, Araia herri urbanoaz gain beste 9 herri daude: Albeiz, Ametzaga, Andoin, Arriola, Egino, Gordoa, Ibarguren, Ilarduia eta Urabain. Atzo, 5 herri ezberdinetako ordezkariekin, Araiako batzordearen kide batekin eta udalaren ordezkariarekin bilera egin genuen, Ahobizi-Belarriprest metodologia herri horietan nola sustatuko den zehazteko.

Alde batetik, herritarrek izena emateko oinarrizko ekintzak zehaztu genituen. Helburua, izen emate arrakastatsu bat lortzea da, euskarari eusteko portaera linguistikoari zilegitasuna emateko. Herri bakoitzean, ezagunei aurrez aurre azaltzea funtsezkoa izango da, herritarrek hurbiltasuna sentitzeko eta honen parte direla jakiteko. Era berean, Lautadako antolakuntzarekin koordinatuta izena emateko esku-orria buzoneatuko da, posterrak herriko gunetan jarriko dira, emailing bidalketak egingo dira, eskualdeko web gunea eta sare sozialak baliatuz.

Bestetik, Ahobizi eta Belarriprest rolek daramatzaten hizkuntz portaera berriak kontzienteki plazaratzeko nola prestatu argitu genuen. 11 egunak iritsi baino lehen herritarrek jokaera berriak barneratzeko prestakuntza garrantzi handikoa da. Lautadako antolakuntzatik eskainiko diren hainbat bitarteko baliatuko dira Asparreneko herrietan: bideo tutorialak, buletinak…  Ahalduntzeko eta aktibatzeko 4 orduko ikastaroa ekainaren 4an eta 6an antolatuko da Araian, eta, 1,5 orduko tailerrak udazkenean antolatzea aurrerago zehaztuko da.

Asparreneko Udalak, Lautadako beste 7 udalekin batera, 11 Egun Euskaraz finantzatzeko ezohizko ekarpen ekonomiko bat egin du, orain arteko euskararentzako udal aurrekontua handituz. Era berean, udalerriko 5 herritako Batzar Administratibo metodologiaren sustatzaile dira dagoeneko, falta diren kontzejuetan hurrengo astetan aurkeztuko da. Euskaraldia elkarlanean antolatzen ari gara, eragile sozialak eta instituzionalak.

Hemendik aurrera Asparrenean, Lautada eskualderekin batera, 3 prozesu ipiniko dira martxan: izen-emate kanpaina, herritarrak prestatzekoa eta metodologiaren sustatzaileak lortzekoa.

Asparreneko herriak martxan daude!



https://lautada.euskaraldia.eus/asparreneko-herriak-antolatuz/

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa