Iritsi da G eguna

Erabiltzailearen aurpegia

Koldo Alzola

Andre batek ikaratuta hots egin du eta zuzenean sartu dute haren deia irratiko mikrofonoetan: «bortxaz atera gaituzte etxetik, autobus batean igoarazi eta kiroldegi batean sartu gaituzte. Sakelekoak ere kendu dizkigute. Nik lortu dut nirea ezkutatzea... inork ez daki zer demontre ari den gertatzen... Garoñan zerbait arraroa gertatu den zurrumurrua dabil, ezbeharren bat edo...».

Gasteiztar askoren beldurra astindu duen alarma gezurretakoa da, Hala Bedi irratiak prestatutako fikziozko albistegiaren antzezpena baino ez. 2004an Gasteizko irrati librekoekG egitasmoaizeneko irrati fikzioa emititu zuten. Haren bidez, garai batean Orson Wellsek “munduen gerran” egin zuen moduan, sinestarazi nahi izan zieten entzuleei Garoñako zentral nuklearrean istripu bat gertatu zela, eta baita lortu ere. Esperimentuarekin bi kezka utzi zuten agerian; batetik, jendeak itsu-itsu sinisten duela hedabideek ontzat ematen duten edozein berri, eta bestetik, Garoñak eztanda egin duen albistea guztiz sinesgarria dela, eta hala gertatuz gero, ez dagoela tamaina horretako ezbehar bati aurre egiteko inolako neurririk.

Garoñaren presentzia mehatxugarriaren aurkako herri mugimendua historikoa da Araban. Hamarkadak daramatzagu, urtez urte, kalera ateratzen zentral nuklearra itxi dezaten aldarrikatzera; akanpadak, mahai inguruak, protesta ekintzak ere egin ditugu. Erakundeetan ere mehatxu nuklearra gaitzezteko hamaika adierazpen onartu dituzte. Eta azkenik iritsi da unea. Iritsi omen da Garoña behin betiko itxi duten eguna. Baina ez dute itxi hiritarren edota ingurugiroaren segurtasunarekiko begiruneagatik, baizik eta jardunean jarraituz gero urtarriletik aurrera ordaindu beharko zuketen isun erraldoia saihesteagatik. Hala ere, itxieraren berri izan orduko txanpain kopa bat eskuan garaipenagatik topa egin dugunean, sinestarazi nahi izan diogu elkarri geu izan garela Garoña itxi dugunok, garaipen txiki horiexek baitira borrokan jarraitzeko hauspoa ematen digutenak.

  

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide