Fosil honek Australopithecus afarensis-ren ezaugarri batzuk gordetzen omen ditu, baina baita lehen hominidoaren zantzuak ere.
500.000 urte zaharrago omen, baina Darwin-en eboluzio teoriak zentzu osoa galdu ote du?
Gure ingurura begiratzea besterik ez dago. Atzeraka goaz bai gizatasunean, bai ingurumena zaintzeari dagokionez, eta baita adimen kontuetan ere. Gero eta adimen artifizial gehiago, orduan eta gizatasun gutxiago.
Fusilamendu pelotoiak prest dira Estatu Batuetako kartzeletan heriotz zigorrera kondenatuak tirokatzeko asmotan eta Historia zero urtean jarri nahi duenik ere bada Siria aldean.
500.000 nioen, eta numeroek sarri diruarekin edukitzen dutenez harremana 500.000 urte horiek euro bilakatu dira iruzurgile eta lapurren eskuetan, eta ondorioz, fidantza fiskal eskakizun behin lapurreta edo erabilera okerra azaleratu denean.
Batetik, Osasuna futbol taldea, Archanco presidente ohia eta UPNren gobernua. Bi milioi eurotik gora desagertuak, futbol partidu erosiak, jokalari ohiak ere epaitegietan deklaratzen...txolopote ederra!
Bestetik, Gasteizko udala, San Antonio kaleko lokalak, Alfonso Alonso Espainiako Osasun ministroa, Gonzalo Anton enpresaburua eta gure alkate txit garbia, Javier Maroto. Fiskalak kasu honetan ere 500.000 euroko fidantza ezarri die ustezko iruzurgileei.
Eta beraiek kartera zabaldu eta hurrengo egunean ordaintzen dituzte epaileak eskatutako 500.000 euroko fidantzak, langile arrunt batek bere 25 urte baino gehiagoko soldatak beharko lituzkeenean horrelako dirutza bildu ahal izateko.
Kutxabank, De Miguel, Bidegi, Hiriko, Osasuna, Gurtel, Palma Arena, Andaluziako EREak...kasu ugari epaitegietako aretoetan eta denek estamentu zaharra ukitzen. Garatu gabeko demokrazia inperfektu baten lekuko. Partidu zaharkitu eta usteldu batzuen ohiko praktiken ondorio.
Garai berriak behar ditugu zalantzarik gabe, aire garbiak, leihoak zabaldu eta bentiladoreak martxan jarri. Baina ez kaka zabaltzeko, orain arteko agintariak euren eserlekuetatik aldentzeko baizik.
Homo sapiens ei gara.
500.000 urte zaharragoak-
Baina, barkatuko didazue, homo lapur egokiago?