Zoriontasuna paperezkoa da, tupustean erre, zimurtu, horitu, busti, moztu eta desegin daitekeen materialez egina baitago. Eta jakin badakigu, papera puskatzen denean ezin dela berregin.
Harri. Iz. Materiaren zati solido eta gogorra, askotariko konposizio kimikoa duena (…)
Zer dira ilusioak? Egun ilunetan ekialdetik ateratzen diren eguzki-izpiak dira. Irribarre bat, begirada sakon bat, besarkada bero eta amaigabe bat, berri on bat, hitz bat, laztan bat, galdera bat (edo erantzun bat), gosari bat, dei bat… 
Harria baino egonkorragoak diren materialak gutxi dira. Betierean gorde ditzakegun harrixkak ez baitira edozerekin hondatzen: ekaitzen osteko euri zaparrada gaindi dezakete eta ez dira ezeren aurrean makurtzen, tolesten edota uzkurtzen.
Ilusioak harriz eginak daude, gogorrak dira, apurtezinak eta pisutsuak. Oso pisutsuak. Lorterrazak dira gainera, kale-ertz orotan hainbat eta hainbat baitaude, normalean gure arreta bereganatzen ez duten arren. Gure esku dago: oinkada moteldu, makurtu eta harrizko ilusio bat etxera eraman dezakegu. Orduan konturatuko gara eguna kolorez janzten dela.
Utz diezaiogun paperezko zoriontasuna bilatzeari, harrizko ilusio txikiz inguraturik gaude eta!