Gazteei zuzendutako aisialdi osasuntsu eta alternatiboa sustatzeko helburuarekin, udaberri-udako programazioak 22 jarduera eskainiko ditu ekainaren 13ra arte. Programazioa gazteekin elkarlanean diseinatu dute, eta lantegi artistikoak, irteerak, ekintza eszeniko eta kulturalak, sukaldaritza sortzailea, gitarra ikastaroa eta euskal dantzak barne hartzen ditu.
Ekintza guztiak doakoak dira eta, aurrekoan bezala, denboraldi honetan ere pertsona bakoitzak gehienez hiru jardueratan izena emateko aukera du. Kontuan izan, entradium-en bidez kudeatutako ikuskizunak eta irekiera librea duten ekintzak ez direla muga honetan sartzen.
Lehen jardueretan izena emateko aukera pasa den ostiralean (otsailak 6) ireki ziren; besteetarako, berriz, izen-emateak pixkanaka zabalduko dira datozen asteetan. Izen-emateak Gasteizko Udalaren webgunearen bidez egingo dira.
Programazioak gazteen parte hartzea eta aniztasuna sustatzea du helburu, gustu eta interes ugaritara egokitutako proposamenekin.