Aldartea

Erabiltzailearen aurpegia

Gaizka Amondarain

 

Badauzkat inguruan, edozein dela urtaroa ere, beti irribarrez hartzen nauten pertsonak. Badauzkat, depresiorako berezko joera ageri dutenak ere, triste xamar nabari dituzunak eskuarki. Badira edozein dela arrazoia, segundo bian sutan jartzeko kapazak. Badaude egoera patxadaz aztertu eta gero, erabakiak hartzea nahiago dutenak. Batzuek ez didate egundo beraien penarik kontatzen. Besteek beti dute egonezinen bat barruak jaten. Askok urduri ipintzen naute iragarkietako irri artifizial konstante horrekin. Gutxi batzuek edonor ozpintzeraino nekatzeko abilidadea garatu dute denborarekin. Nik berdin maite eta gorroto ditut denak halere. Haiek ni bezainbeste.

 

Aldartea gauza pertsonala delako izatez. Hala diote adituek behintzat. Ez dela denontzat barregarria izan daitekeen ezer existitzen, ezin dela poztasun kolektibo eta erabatekoa sortuko digun egoerarik irudikatu. Batzuen desgraziarako albiste direnak, besteentzat pozteko aitzakia eder bat izatea ulertzekoa eta normala ei da. Bihar Espainiako erregea hilko balitz adibidez (udaberriko tendentziei jarraiki), zer egin beharko luke herriak? Negar? Barre? Lutua gorde ala mozkortu?

 

Umetan, politikoki zuzenak ez diren sentimenduak erreprimitzen irakatsi ziguten, baiki. Zigorra zigorraren atzetik pilatzearen poderioz, dena kontatze aldera (gure emozioak ulertzen ikas genezan, zoritxarrez, ez zuten ahalegin bera egin). Hala ere, eta zorionez, sentitzen jarraitzen dugu oraindik. Eta ez da gutxi. Nork bere poz eta penak bizi baititu lehen pertsonan, besteenak ulertzeko ere gai izango da gero, bigarrenean edo hirugarrenean. Baina printzipioz, bereak sentituko ditu beti bereago.

 

Zeri egin behar diogun barre eta nori negar zehaztearekin tematzen denak, beraz, bi arazo dauzka: edo ez ditu aurretik aipatu ditugunak ulertu gura, edo badu haurtzarotik arrastaka dakarren beldurren bat ezkutatzeko. Haurtzarotik helduarorako” trantsizioa” behar bezala osatu ez izanaren ondorio izan daiteke apika. Trantsizio horrek zintzotasuna eskatzen duelako, norbera lasaiago uzten duten baina luzera kaltegarri diren gezurrak biluztea. Eta horretarako, agidanez, ez dago aldarterik momentuz herri honetan.

 

 

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide