Dibertigarria izan daiteke egiaztatzea daturik zehatzenak ere erlatiboak direla batzuetan. Ez naiz ari, greba baten testuinguruan, sindikatuen eta patronalaren arteko zenbaki-gerrez; ez eta, hauteskunde giroan, hautagai bakoitzak ematen duen datu propioaz ere.
Hain transzendentalak ez diren bestelako egitate mota batzuei buruz ari naiz. Adibidez, o meu compañeiro Pessoaren altuerari buruz. Lisboatarrak paperean idatzi zuen metro bat eta hirurogeita hamar zentimetroko garaiera zuela. Halarik ere –Pessoak berak ohartarazi didanez–, Internetek dio hiru zentimetro altuagoa zela.
Dibertigarria izan daiteke egiaztatzea daturik zehatzenak ere erlatiboak direla batzuetan
Nik ere ezagutu dut –Mileva Marić gogoan– neure altueraren erlatibitatea. Hondurasen. Duela hogeitaka urte. Orduan, nire garaieraren datua ez zen aldatu, bai, ordea, balorazio soziala: bertakoen hitzetan, "alto" nintzen; bai eta "barbón" ere, bide batez. Hemen, alabaina, baxutxoa eta bixarguria naiz aspalditik.
"Ikusten dudanaren neurrikoa naiz", idatzi zuen Pessoak. Zientzia egiteko asmorik gabe. Txundigarriro asmatuz.
Edu Zelaieta Anta.
Iritzi artikulu hau argitaratzean, ALEAk ez ditu bere gain hartzen egileak adierazitako iritziak, ezta horiekin lotutako erantzukizunak. Zure iritzia bidali nahi baduzu, idatzi erredakzioa@alea.eus helbide elektronikora.