Sei ter o pasmo esencial idatzi zuen Fernando Pessoak. "Badakit oinarrizko harrimena izaten" modura itzul genezake euskarara. Eta hala ekarriko dugu astero ALEAra, 2023-2024 ikasturte honetan.
Harrimena, bizitzako gauza gehien-gehienak bezalaxe, landu egin daiteke –hori, duda izpirik gabe, berri ona da–. Gehiegizko atrebentziaz akaso, harrimena lantzeko ariketak josteari ekin diot, eta irule deitu neure buruari. Izan ere, ehuntzeko gaia hari bihurtzea da irutea, Euskaltzaindiaren arabera. Eta langintza horretan, zirrosiak jota literaturaren historiara igaro zen Pessoaren laguntza ezin hobea da.
Egina da gonbita, lagunok, harriduraren zirrara sumatzeko. Gorputz-gogoa, nolabait edota norabait, mugitzeko. Jendea harritzen ez den guztietan –geu gara jende hori, hirugarren pertsona bilakatuta– harritzen hasteko. Pessoa eta biok bezala.
Edu Zelaieta Anta.
Iritzi artikulu hau argitaratzean, ALEAk ez ditu bere gain hartzen egileak adierazitako iritziak, ezta horiekin lotutako erantzukizunak. Zure iritzia bidali nahi baduzu, idatzi erredakzioa@alea.eus helbide elektronikora.