Hegemoniaz

Erabiltzailearen aurpegia
Arg: The Politician

"Banaturiko 116 Nobel sarien artean, hambost izan dira bakarrik emakumezkoentzat"

Netflixen The Politician izeneko telesail bat dago. Argumentua hurrengoa da: nerabe batek helburu argi bat dauka, AEBetako presidente izan nahi du, eta bere bizitza guztia jomuga horretara bideratzen du. Horregatik, AEBetako presidente guztien biografiak nolakoak diren aztertzen ditu eta horien arabera modelatzen du bere burua.

Orain, demagun guk gauza bera egin nahiko genukeela, baina idazleekin, hau da, gaztetatik moldeatu gure ibilbide guztia helburu zehatz batekin: munduko idazle onena izatea. Bada, gauza guztien artean, agian helburu polit eta argi bat Nobel sari bat lortzea izango litzateke, ezta? Eta, asmo horretan, Nobel sariak banatzen dituen epaimahaiaren lehentasunak zein diren aztertzea komeniko da, noski. Nik neuk, zuei lana errazteko, ikerketa txiki bat egin dut eta ondorio batzuk atera ditut. Entzun ezazue ondo:

Hasteko, hobe gizona bazara, dudarik gabe. Izan ere, banaturiko 116 Nobel sarien artean, 15 izan dira bakarrik emakumezkoentzat. Hala ere, emakumea bazara, behintzat, izan herrialde indartsu eta lehenmundutarrekoa, 16 nobel saridun baino ez dira-eta estatu txiki eta kolonizatu batean jaioak. Baina, kontuz, zalantzarik gabe, hartu behar duzun neurri garrantzitsuena da zein hizkuntzatan idatziko duzun. Hemen dago gakoa, zeren estaturik gabeko hizkuntzak ia-ia debekatuta baitaude Nobel Sarietan. Adibide bakarra aurki liteke, eredua konfirmatzen duen salbuespena, alegia. Gure estatu gabeko hizkuntzen ordezkari bakarra Frederic Mistral da; 1904an lortu zuen saria, Okzitaniako hizkuntza erabiliz; handik aurrera, ezer ez estatu propiorik gabeko hizkuntzentzat. Hortaz, Nobel sari bat eduki nahi baduzue, mesedez, hizkuntza handi, polit eta, batez ere, estatala ikasten has zaitezte, ez galdu denborarik.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide