Mikel Urdangarin musikariaren ustez (Zornotza, Bizkaia, 1971), kontzertu bakoitza ospakizunerako arrazoi da, baita Gasteizko Printzipal Antzokian gaur, hilak 23, egingo duen emanaldia ere. 21:30ean izango da, eta banda Izurdeen lekua lanarekin taularatuko da; kanta berrien eta zaharren arteko koherentzia izango du hizpide. Datozen hilabeteetan ere ez dira geldirik egongo.
Prest al zaudete kontzerturako?
Bolada zaila daramagu, eta gogotsu gaude. Baina ez bakarrik Gasteizerako, baizik eta datozen guztietarako ere bai. Beti izan da ospakizun bat oholtza gainera ateratzea: ez dut sekula normalizatu, ez dut sekula arrunt bilakatu. Ospakizun bat da, taula gainera ateratzea ospatzen dugulako, eta jendaurrean jotzea.
Izurdeen lekua lana aurkeztuko duzue. Egin dezakezu emanaldiaren aurrerapen bat?
Kontzertua bi zatitan banatu ohi dugu. Lehenengoan, diskoaren aurkezpen osoa egiten dugu, hasi eta bukatu; bigarrengoa errepertorio zaharreko hautaketa bat izaten da. Bi parteen artean ahalik eta koherentziarik eta harmoniarik handiena egon dadin saiatzen gara.
Elkarrizeta hau BERRIA hedabideak argitaratu du eta Creative Commons by-sa lizentziari esker ekarri dugu ALEAra. Jatorrizko albistea hemen duzu ikusgai.