Koronabirusa

Hego Euskal Herrian 1,2 milioi herritar txertatu dituzte

Erabiltzailearen aurpegia
39 eta 30 urte artekoen txertaketa ekainaren amaieran edo uztailean hasiko da. / IREKIA

Gaur hasi dira 49 eta 40 urte artekoak txertatzen Hegoaldean. Gotzone Sagardui Osasun sailburuak esan du oporretara joateagatik txertoa hartzeri uko egiten dutenek "itxaron" egin beharko dutela dosi hori hartzeko.

Iazko abenduaren 27an ekin zitzaion Hego Euskal Herrian COVID-19aren aurkako txertaketa kanpainari, eta ordutik 1.234.939 lagunek hartu dute birusaren kontrako txertoren bat. Alegia, herritarren %43,3k lehenbiziko dosia hartua dute, gutxienez. Eusko Jaurlaritzako Osasun Sailak emandako datuen arabera, atzo arte 999.423 lagunek lehen dosia hartua zuten Araban, Bizkaian eta Gipuzkoan, eta 523.000 lagun baino gehiagok osatua zuten pauta. Nafarroan, berriz, 279.121 herritarrek hartua dute lehen dosia, eta pauta osoa, berriz, 158.990 herritarrek daukate. Hori hala, Hego Euskal Herriko herritarren %24k osatua dute pauta (682.392 lagun).

Txertaketa kanpainak erritmo bizia hartu du azken asteotan. Gaur, Arabako, Bizkaiko, Gipuzkoako eta Nafarroako 49 eta 40 urte arteko herritarrak txertatzeari ekin die Osakidetzak eta Osasunbideak.

39 eta 30 urte bitartekoak, uztailean

Gotzone Sagardui Eusko Jaurlaritzako Osasun sailburuak gaur goizean Radio Euskadin egin dioten elkarrizketan adierazi du aurreikusitako txerto kopurua iristen bada, ekainaren amaieran edo uztailaren hasieran hasiko direla 39 eta 30 urte artekoak txertatzen. Adingabeen txertaketari ere lehenbailehen ekin nahi dio Osakidetzak. Sagarduik jakinarazi duenez, 12 eta 16 urte artekoak iraila baino lehen txertatzen hasteko asmoa dute.

Bestetik, Sagarduik ohartarazi du udako oporretara joateagatik txertoa hartzeari uko egiten diotenek "itxaron" egin beharko dutela dosi hori hartzeko. Hori hala, herritarrei dei egi die udako oporraldiak ongi "planifikatzeko" eta txertaketari "lehentasuna" emateko.

Albiste hau BERRIAk argitaratu du eta Creative Commons by-sa lizentziari esker ekarri dugu ALEAra. Jatorrizko albistea hemen duzu ikusgai.

Grafikoak

Koronabirusa
Txertaketa EAEn

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide