Ostiral goizean gertatu da, 10:30 aldera. Bistaz ezagutzen zuen emakume bat ikusi du gizonak, eta bere lanera eramango duela proposatu dio. Emakumea autoan sartu da, gizonarekin. Baina, behin martxan jarrita, gizona bidetik atera da, gasolindegi batera joan behar zuela aitzakia gisa jarrita.
Apartatutako leku batean gelditu du autoa, eta han emakumea itotzen saiatu da. Ertzaintzak azaldu du bortxatu ere egin duela.
Salaketa jasotakoan, poliziek ikerketak hasi dituzte, eta, gizona identifikatu dutenean, atxilotu egin dute, ostiral gauean jakinarazi dutenez. Aurrekariak ditu, ertzainen esanetan. Datozen orduetan eramango dute epailearen aurrera.