Bertsolariei plazak eskaini eta entzuleari saioak gerturatzea helburu duen Arabako bertsolariak oholtzapetik entzulea epaile egitasmoa ekainaren 23an abiatu zen Amurrion. Bigarren saioa Zigoitian izan zen ostiralean. Bertan aritu ziren honako bertsolariak, Oier Suarez gai jartzailearen aginduetara: Xabier Antia, Aroa Arrizubieta, Manu Bendala, Eukene De los Aires, Oihane Perea eta Ekaitz Samaniego.
Arratsalde ederra egiten zuen saiorako, ez hotz ez bero, baina bertsolariek berotu zuten giroa, eta umore errima ederrak bota zituzten bertaratuen gozamenerako. Saio amaieran, entzuleek bertsolariek egindako lana txalotu zuten, zeinek txalo dezibelio gehiago jaso hark irabaziko baitzuen eguneko ekitaldia; eta hori hala izanik, Manu Bendala izan zen garaile, eskualdean bertan finkatutako bertsolaria.
Oholtzapetik egitasmoko hirugarren jardunaldia, eta irailera arteko azkena, datorren ostiralean, uztailaren 14an, Ozetako tabernako plazan jokatuko da, 19:00etan. Oihane Perea gai jartzailearen eskutik, Sabin Abarrategi, Hegoi Amabizka, Irati Anda, Unai Anda, Orlando Arreitunandia eta Iñaki Viñasprek kantatuko dute.
Informazio gehiago Arabako Bertsozale Elkartearen webgunean.