Abian da Arabako Binakako Bertsolari Txapelketaren lehen edizioa, eta asteburu honetan jokatu dira lehenengo bi final laurdenak. Elkar igurzten duten bi mikro atzeko irudian, bikotearen elkarlana eta konplizitatea irudikatuz. Dena prest hasiera emateko, mikroak, distantziak eta baita mikro garbitzailea ere.
Lehenengo itzuli honetan, hamahiru bertso puntuagarri kantatu ditu bertsolari bakoitzak; 26 bertsolari bikoteak.
Unai Anda eta Iñaki Viñaspre
Lehen final laurdena larunbatean jokatu da, Izarrako Kultur Etxean. Hiru bikote aritu dira: Felipe Zelaieta Txurruka (Gasteiz) eta Xabi Igoa Eriz (Aramaio); Unai Anda Delika (Ametzaga) eta Iñaki Viñaspre Simon (Abetxuku); eta Andere Arrioabengoa Bengoa (Aramaio) eta Xabi Antia Zuaznabar (Gasteiz).
Ariketa guztiak egin ondoren, Iñaki Viñaspre eta Unai Andak lortu dute puntu gehien: 469 puntu. Beraz, zuzenean pasa dira finalerdietara.
Martin Abarrategi eta Manex Agirre
Larunbatean hasitako bideari igandean heldu diote bertsolari bikoteek, eta, igandean, Araian jokatu da bigarren final laurdena. Hiru bikoteak honako hauek izan dira: Eli Zaldua Barquin (Gasteiz) eta Aitor Ugarte Eriz (Aramaio); Martin Abarrategi Sarrionandia (Aramaio) eta Manex Agirre Arriolabegoa (Aramaio); eta Peru Abarrategi Sarrionandia (Aramaio) eta Beñat Garaio Mendizabal (Gasteiz).
Martin Abarrategi eta Manex Agirrek irabazi dute. Puntuaziorik altuena lortuta, 474 puntu, zuzenean pasa dira finalerdietara.
Finalerdiak
Datorren larunbatean, Oionen, erabakiko da zein sei bikotek jokatuko dituzten finalerdiak: hiru bikote irabazleak zuzenean joango dira finalerdietara, eta beste hirurak hiru final laurdenetako puntuazioaren hurrenkeran erabakiko dira.
Informazio gehiago eta hurrengo saioen inguruko xehetasunak Arabako Bertsozale Elkartearen webgunean topa ditzakezue.