Hogeita hamar urte beteko ditu aurten Euskal Herriko Eskolarteko txapelketak. 1989an jokatu zen lehen aldiz Donostiako Karmelo Balda pilotalekuan, aurretik ere herrialdetako eskolartekoak egiten ziren arren.
Aurten, iazko agertokia errepikatuta, Saran izango da hitzordua. Trinketean izango da finala, 11:30etik aurrera. Zazpi lurraldeetako eta 15-18 urte bitarteko hamahiru bertsolari gaztek hartuko dute parte: Arabatik, Aitor Ugarte Eriz (Aramaio, 2002) eta Aroa Arrizubieta Barredo (Gasteiz, 2001); Baxenabarretik, Elixabet Etxandi Goyenetche (Izpura, 2000) eta Julen Etxeberri Etxart (Zaro, 2001); Bizkaitik, Gorka Pagonabarraga Agorria (Durango, 2000) eta Iruri Altzerreka Martinez (Garai, 2000); Gipuzkoatik, Oihana Arana Kardenal (Eskoriatza, 2001) eta Aner Peritz Manterola Euzkitze (Zarautz, 2002); Lapurditik, Hodei Renteria Maleta (Angelu 2000) eta Irati Alcantarilla Urdanpilleta (Urruña, 2001); Nafarroatik, Xabat Illarregi Marzol (Leitza, 2001) eta Ekiñe Zapiain Arlegi (Bera, 2002); eta Zuberoatik, Haritz Capot Thornary (Zalgize, 2001).
30. urteurrena
Bi atal izango ditu saioak. Hasierako agurraren ondotik, binaka ariko dira zortziko handian zein txikian; eta gero, puntuazioz sailkatutako lehen seirek bakarkako ariketak egingo dituzte. Egitasmoaren 30.urteurrena tarteko, bertsolari eta Ikastolen Elkartean bertsolaritza sustatzaile arduratan aritu denak jantziko dio txapela irabazleari.
Saioa amaituta, ospakizunetan ohi denez, mahai bueltan jarraituko du festak: bazkaria izango da Sarako Lur Berri gelan, 14:00etan Idokiren eskutik, eta, ondoren, Saran'ga txarangaren doinuek eutsiko diote festaren txinpartari.