Bertso-eskolak asko dira Araban, eta askotariko kideak daude bertan. Adinez, kezkaz, ilusioz eta asmoz anitza da Arabako bertso-ekosistema. Adin guztietako jendeak hartzen du parte bertsoaren etxe diren egitura txiki horietan; eta, pozik esan dezakegu horietako asko eta asko ume eta gazteak direla. Kezka, ilusio eta asmo ezberdinak dituzten ume eta gazteak dira, baina gauza bat behintzat partekatzen dutenak: maiatzean, plazara ateratzeko saltoa egiteko aukera ederra dute.
Eskolartekoa da horretarako aukera ematen duen ekimena. Eta adin-tarte ezberdinetan, formatu ezberdina hartzen du gainera ekimenak. 14 urtetik beherakoetan, eskualdez eskualdeko topaketak izango dira bertsolari gaztetxoen bilgune:
- Lautadako topaketa: maiatzaren 11n, Aguraingo Zabalarte aretoan, 18:00etan.
- Gorbeialdeko topaketa: maiatzaren 11n, Aramaioko Sastiñan, 17:30ean.
- Aiaraldeko topaketa: maiatzaren 18an, Amurrioko katekesi aretoan, 18:00etan.
- Mendialdeko topaketa: maiatzaren 18an, Kanpezuko kultur etxean 17:00etan.
- Gasteizko topaketa: maiatzaren 19an, Gasteizko Beñat Etxeparen, 11:00etan.
- Arabar Errioxako topaketa: maiatzaren 20an, Oiongo plazan, 13:00etan.
Maiatzaren 26an amaituko dira gaztetxoen hitzorduak, Zigoitiko Bengolarra frontoian 10:00etan egingo den Arabako topaketarekin.
14 urtetik gorakoek, ordea, hitzordu bakarra izango dute. Ez nolanahikoa ordea: Bertsoa Bizi Gazte egunaren bigarren edizioa egingo dute maiatzaren 12an, Legution. 11:30ean hasita, Bertsoa Bizi Gazte bideoklip lehiaketaren emanaldiak egingo dituzte, eta ondoren etorriko da gaztetxoen eskolarteko txapelketaren finala. Protagonistak, honako boskotea: Martin Abarrategi, Peru Amorrortu, Aroa Arrizubieta, Beñat Cano, Mikel Martin eta Aitor Ugarte. Sari banaketarekin bukatuko da ekitaldia.