Euskal Telebistako Go!azen telesail arrakastatsua Gasteizen bueltan izango da datorren igandean, hilaren 26an, Go!azen 11 Kontzertuak emanaldi bikoitzarekin: 16:30ean eta 18:30ean. Telesaileko aktoreak Europa biltzar jauregiko auditoriumaren agertokira igoko dira, abesteko, dantzatzeko eta telesailaren alderdi dibertigarriak kontatzeko.
Denboraldi honetan, aldaketak izango dira Basakabin! Maitane udalekuko zuzendari berria izendatu dute, eta aurten gainera, omenaldi berezi bat ospatuko dute Basakabin. Hori antolatzeko, Leire izendatu dute arduradun, eta honek argi dauka bere alaba Izarrek abestu behar duela galan... Baina Maitane ez dago erabat ados erabakiarekin, eta ikasle denek aukera eduki beharko luketela uste du. Nork abestuko du azkenean? Bitartean, Garazik lana dauka Alaia izeneko neska lagundu nahian, batez ere, Aner Basakabiko lorezain berria dela jakin duenetik.