Artziniega Museoko ateak zabalik daude dagoeneko

Erabiltzailearen aurpegia
Artziniega Museoko ateak zabalik daude dagoeneko
Artziniegako museo etnografikoa zabalik da berriro. JOSEBA VIVANCO

Artadi enpresari esleitu diote gida zerbitzuaren kudeaketa. Talde politikoek eta Artea etnografia elkarteak positiboki baloratu dute museoa irekitzeko lortutako akordioa.

Larunbatean ireki zuten berriz Artziniega Museoa, bi hilabete baino gehiago itxita egon ostean. Ostiralean egin zuten gida zerbitzuaren esleipena. Hainbat enpresaren eskaintzak aztertu zituzten Artea etnografia elkarteko kideek. Arabako Foru Aldundiko Museo Zuzendaria, Artziniegako alkatea eta Artziniegako Udaleko talde politikoen ordezkariak bertaratu ziren hautaketa prozesua ikustera. Azkenean, Artadi enpresari esleitu zioten gida zerbitzuen kudeaketa.

Gauzak hala, museoa hurrengo egunean ireki ahal izan zuten, Artadi delako orain arte gida zerbitzuaz arduratu dena eta, ondorioz, ez delako ezagutza-transmisiorik egin behar izan. Hala ere, Arteako kideek nabarmendu dute soluzioa behin behinekoa baino ez dela, instituzioen arteko akordioak museoa 2019an irekitzea bermatzen duelako soilik. "Hurrengo urtera begira ez dago ezer ez itxita", azpimarratu dute.

Talde politikoen balorazioak

Artziniegako talde politikoek positiboki baloratu dute museoa berriz irekitzea. "Hurrengo pausoan lanean jartzeko unea da orain: museoaren bideragarritasun plana", adierazi du EAJk. EH Bilduk, aldiz, garaipena “herriarena" izan dela nabarmendu du. "Batzuk museoa ixten saiatu ziren, baina ezin izan zuten", azaldu du Joseba Vivanco zinegotziak.

Artea elkarteko kideek, euren aldetik, eskerrak eman nahi izan dizkiete "Artziniegako herriari, museoa maite duten pertsona orori, MuseoaBizirik herri mugimenduari eta komunikabideei, erakutsi duten interesagatik".

Albiste hau Airaldea.eus-ek argitaratu du eta Creative Commons by-sa lizentziari esker ekarri dugu ALEAra. Jatorrizko albistea eta informazio osatuagoa hemen duzu ikusgai.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide