Bertan behera utzi dituzte Latiorro Ikastetxeko amiantoari buruzko salaketak

Erabiltzailearen aurpegia
Bertan behera utzi dituzte Latiorro Ikastetxeko amiantoari buruzko salaketak
Latiorro Ikastetxean amiantoa zegoela jakiteak hautsak harrotu ditu Laudion. AIARALDEA.EUS

Fiskalak ikasle baten aitak jarritako salaketa artxibatu du, eta Arartekoak adierazi du Udalak ez duela informaziorik ezkutatu.

Laudioko Udalaren aurkako bi salaketak bertan behera geratu dira amiantoari dagokionez. Latiorro Ikastetxeko ikasle ohi baten aitak abiatu zuen auzia, eta Fiskaltzak eta Arartekoak egokitzat jo dute Laudioko Udalaren jokaera. Fiskaltzak salaketa artxibatu du, eta Arartekoak txostena osatu du azaltzeko Udalak arazo horren inguruko proiektu guztiak gurasoen esku utzi dituela.

Berez, Eusko Jaurlaritzako Hezkuntza Sailak konpromisoa adierazi du 2020an, beranduenez, amiantoa guztiz kentzeko ikastetxetik. Laudioko Udaleko alkateorde Jon Ander Altubek azaldu du gobernu taldeak 2013an hartutako bideari jarraituko diola, eta espero dutela 2020an amiantorik ez geratzea Latiorron. Horrez gain, nabarmendu nahi izan du fiskalak ez duela delitu zantzurik aurkitu eta Arartekoak ziurtatu duela erakundeak ez duela informaziorik ezkutatu. Altubek berretsi du eskola komunitatea osatzen dutenak direla eurentzat zilegitasuna duten ordezkariak.

Informazio osagarria: Aiaraldea.eus

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide