Udan itxiko dute Amurrioko herriguneko gasolindegia

Erabiltzailearen aurpegia Aiaraldea Gaur 2016ko api. 24a, 08:00

Eraikina era boluntarioan husteko epe legalak errespetatu ondoren, Amurrioko Udalak herriko erdiguneko gasolindegiak okupatzen dituen lursailak husteko agindua onartu du aho batez. Uda partean behin betiko itxiko dela aurreikusi du.

Enpresa kudeatzen duten arduradunei jakinarazpen ofiziala helarazi ostean, hilabeteko tartea izango dute jarduna eteteko. Gasolindegiak orain okupatzen duen lurzoruaren kalitatea berreskuratzea izango da hurrengo pausoa.

Etorkizuna zalantzan
Tokiko Gobernuak gasolindegiko lanpostuak eta ematen duen zerbitzua mantentzeko asmoa badu ere, horren etorkizuna ez dago argi. Horren harira, Amurrioko alkatea Josune Irabienek aurreratu du enpresa-jarduera hori berriz ezartzeko aukerak daudela: "Arabako Foru Aldundiarekin elkarlanean, gasolindegiko jabeari proposamen batzuk egin dizkiogu eta batzuk atzera bota dituen arren, beste batzuen inguruan ez du ezer esan. Oraindik haien artean hizketan dabiltza". Aukera horiek guztiak "indarraldian dagoen legeria bete eta hiri eremutik kanpo daudenak" direla gaineratu du Irabienek.

1959. urtetik
Gasolindegia 1959an jarri zuten martxan, 50 urterako jarduera doan egiteko baimentzen zion akordio bati esker. Epemuga gaindituta, 2009ko martxoaren 26an hartu zuten bertatik kentzeko erabakia, alderdi guztien onespenarekin.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide