Iritzia

Auzotik kanpora, berriro

Erabiltzailearen aurpegia Errekabarri Eguzkia Guraso Elkartea 2023ko urt. 20a, 12:30
Errekabarri ikastetxe publikoa, Salburuan. / Argazkia: Aterpe Aparejadores

"Hezkuntza Sailaren konpromisoa izan zen Salburuan bizi diren ikasleek auzoan beren ibilbidearekin jarraitu ahal izango zutela eta obra 2021ean amaituta egongo zela. Errealitatea da 2024ko irailera arte ez dela erabilgarri egongo".

Gasteizen ohitu egin gara eskola publikoa bigarren mailako elementua izatera auzo berrietan. Salburua eta Zabalgana auzoetako eskola publikoen eraikuntzetan izandako atzerapenek ehunka familia etengabeko borrokara kondenatu dituzte. Barrakoiak, joan-etorriak eta espazio faltak etengabeak izan dira familientzat eta seme-alabentzat. Gainera, arduradun politikoen gezurrak eta harrokeria pairatu behar izan ditugu.

"Errekabarriko ikasle askok auzoan bi edo hiru urtez bakarrik ikasi ahal izango dute"

Baina Eusko Jaurlaritzaren eta Arabako lurralde ordezkaritzaren arduragabekeriak ez du mugarik: Salburuko institutuak urte askotako atzerapena pilatu du. Ondorioz, gure seme-alabak auzotik kanpo lekualdatu dituzte berriro. Eskolatzea amaitzean (2 eta 17 urte bitartekoa), Errekabarriko ikasle askok auzoan bi edo hiru urtez bakarrik ikasi ahal izango dute.

Institutu berriaren lanak duela urte batzuk amaituta egon behar zuen. Hezkuntza Saileko arduradunen azken konpromisoa izan zen Salburuan bizi diren ikasleek auzoan beren ibilbidearekin jarraitu ahal izango zutela, eta horretarako, obra 2021ean amaituta egoteko konpromisoa hartu zuten. Errealitatea da 2024ko irailera arte ez dela erabilgarri egongo. Kudeaketa negargarri horren ondorioz, lekualdatutako ikasle askok hiru kilometro inguru egin beharko dituzte egunero institutura iristeko DBHn, eta bost kilometro Batxilergoa egiteko!

"Lekualdatutako ikasle askok hiru kilometro inguru egin beharko dituzte egunero DBHn; eta bost kilometro Batxilergoa egiteko!"

Egoera horren aurrean, Errekabarriko familiok bilera bat eskatu genien ikastetxeetako ordezkariari eta zuzendariari. Proposamen argia, erraza eta egingarria eraman genuen sortuko diren kalte guztiak minimizatzeko: institutuko obraren atzerapenengatik Ekialde institutura lekualdatu diren ikasleak auzoko institutura itzuli ahal izatea, hura eraikita dagoenean, ibilbide akademikoa bertan jarraitzeko.

Gure harridurarako, Aintzane Arrese ordezkariaren eta ikastetxeen zuzendariaren itxikeria erabatekoa izan zen. Administrazio kudeaketa txiki bat baino eskatzen ez duen proposamen baten aurrean, ezezkoa negoziaezina izan zen.

Errekabarriko familiok borrokan jarraituko dugu, ez dugu etsiko. Auzoko eta gertuko eskola publikoa aukeratzen dugu, eskola baten bertuterik handienetakoa hurbiltasuna dela uste dugulako. Obren atzerapenak ez du erremediorik, baina gure seme-alaben heziketak bai, eta horregatik borrokan jarraituko dugu.

Iritzi artikulu hau argitaratzean, ALEAk ez ditu bere gain hartzen egileak adierazitako iritziak, ezta horiekin lotutako erantzukizunak. Zure iritzia bidali nahi baduzu, idatzi erredakzioa@alea.eus helbide elektronikora.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide