Euskadi Irratia ari nintzen entzuten. Sarri bezala, merkatari euskaldunak elkarrizketatzen ari ziren, beren markak sortu dituzten ekintzaileak, biak ala biak euskal hiztin peto-petoak. Poza ematen du horrek, eta saioa bukatu orduko internetera jo nuen, haien egitasmoak hobeto ezagutzeko irrikaz.
Horietako baten webgunean sartu, eta bai, euskaraz zegoen, euskaldunak aintzat hartzen gaitu, behar bezala. Bestearen webgunera jo nuen jarraian. Beste honek espainiera hutsez zeukan eta dauka webgunea. Dilistarik ere ez euskaraz. Gaztelera hutsez omen "gehiengoarekin komunikatu ahal izateko". Eta bai, horretarako aski du inposatu diguten hizkuntzan jardutearekin, ez du euskararen beharrik.
"Beste batek espainiera hutsez zeukan webgunea. Dilistarik ere ez euskaraz. Gaztelera hutsez omen gehiengoarekin komunikatu ahal izateko"
Bizkarra eman diezaguke lasai asko, merkatari gehientsuenek bezala. Izan ere horretara ohituta gaude, ikusezin izaten irakatsi digute.
Badakigu poliziaren eta epaileen aurrean hobe dela españolez edo frantsesez jardutea, gure hobe beharrez.
Renfen edo Correosen euskaraz aritzea alferrik izaten da, "gehiengoaren" hizkuntzan baino ez baitute egiten, txiripak txiripa.
Mercadonan, Dian, Alcampon, Lidlen, Carrefourren... produktuen errotulazioa erdara hutsez daukate, baina baita "bertoko" Eroskin edo BMn ere, eta ordaintzeko orduan euskaraz ulertuko duenik aurkituz gero, bingo! Zenbakiak baskonikoz ikastea ikaragarri zaila omen, soritxarrekuak gu! Eta berdintsu saltoki, jatetxe eta taberna gehienetan ere.
Ezikusiarena egiten diguten euskaradunek ere, hego haizeari segi besterik ez dute egiten, inposatutako hizkuntzari eta arau nagusi arrotzari men, ostikoa txikiari (txikituari) etxekoa izanagatik ere.
"Ez genuke euren zerbitzurik edo produkturik erosi behar ezikusiarena egiteari uzten dioten arte"
Boteretsuaren, zapaltzailearen alde jarri ohi da zapaldutako asko, nahita edo nahi gabe, zer gerta ere. Baina euskaraz bizi nahi dugunok, euskaldunok, ez genieke horrelakoei hausporik eman behar, ez genuke jokabide hori normalizatu behar.
Ez genieke abegi on egin behar ezikusiarena egiten digutenei, eta are gutxiago euskaldunon hedabideetara gonbidatu, duintasunagatik baino ez bada ere.
Eta ez genuke euren zerbitzurik edo produkturik erosi behar ezikusiarena egiteari uzten dioten arte. Beharbada horrela, ezer erosten ez diegunean, ikusiko gaituzte!
Sinatzailea: JJ Agirre, oinezkoa.
Iritzi artikulu hau argitaratzean, ALEAk ez ditu bere gain hartzen egileak adierazitako iritziak, ezta horiekin lotutako erantzukizunak. Zure iritzia bidali nahi baduzu, idatzi erredakzioa@alea.eus helbide elektronikora.