Aitor Montes Aramaioko medikuak duela egun batzuk jasandako jazarpena salatu du Arrasateko Euskaldunon Hizkuntza Eskubideen Aldeko Protokoloak. Montesek zerbitzua euskaraz emateko daukan eskubidea aldarrikatu dute protokoloko kideek, eta babes osoa helarazi diote eskubide horren defentsan urte luzez aurrera eramaten ari den borrokagatik "eta jasaten ari den jazarpen egoera onartezinengatik".
Debagoieneko ESIko zuzendaritzari gogoratu diote erakunde publikoen betebeharra dela "euren zerbitzuak euskaraz eman eta jasotzeko eskubidea bermatzea". Ildo horretan eskatu diote Montesek, zein zerbitzu publikoetako beste edozein langilek, lana euskaraz egiteko daukan eskubidea babesteko, eta publikoki salatu ditzala euskaraz aritzeagatik jasaten dituen erasoak.
Bitartean, Euskaldunon Hizkuntza Eskubideen Aldeko Protokoloak abenduaren 1ean, 13:00etan, Aramaioko medikuari elkartasuna eta babesa adierazteko elkarretaratzea deitu du, Arrasateko ospitale aurrealdean.
