Astelehen honetako 12:00ak aldera, Larrialdi Zerbitzuek abisua jaso dute N-240 errepidean, Goiain parean (Legutio), gertatutako istripu batez ohartarazteko, furgoneta batek txirrindulari bat harrapatu duela esanez.
Ertzaintzaren patruilak, suhiltzaileak eta osasun langileak bertaratu dira, biktima bertan artatzeko. Segurtasun Sailak baieztatu duenez, suspertze-lanak egin dituzten arren, ezin izan dute ezer egin 68 urteko gizonezkoaren bizitza salbatzeko.
ALEAk jakin duenez, harrapatutako txirrindularia Aramaion jaiotakoa zen, baina Goiain zuen bizileku; haren etxetik gertu izan da istripua. Ertzaintzak ikerketa abiatu du istripuaren arrazoiak argitzeko.