URA agentziak Gorbeialdeko kuadrillako herrien hornidura berritzeko proiektua aurkeztu die kuadrillako toki erakundeetako ordezkariei, Jaurlaritzaren erakunde publikoak ohar batean ezagutarazi duenez.
Proiektuak 0,5 hektometro kubikoko presa bat eraikitzea aurreikusten du —50 milioi litro inguru—, bai eta ura edangarri bihurtzeko estazio bat egitea zein ur hoditerietan berrikuntzak egitea ere. Orotara, proiektuak 35 milioi urteko inbertsioa aurreikusten du.
URAk ohartarazi duenez, "dagokion prozedurari jarraitu beharko dio" proiektuak, behin betiko onartu ondoren lizitatu arte. Agentziaren arabera, "emari ekologikoak errespetatuko dira". Oharrean kokapena zehaztu ez badute ere, aspalditik Zaron egiteko proiektua dago, eta kokapen hori agertzen da ere Jaurlaritzak zabaldu duen aurkezpenaren argazki batean.
Eskualdeak duen "egiturazko ahultasun bati" erantzun nahi diola azaldu du URAk. Kuadrillako herrietan aspaldikoak dira ur hornidurarekin dauden arazoak, batez ere lehorraldiak gertatzen direnenean. Zuiako eta Urkabustaizko alkateek behin baino gehiagotan eskatu dute arazoari konponbide bat eman behar zaiola.
