Urteko azoka garrantzitsuenetakoa ospatuko du Urkabustaizek igande honetan, eta horregatik eskaintza zabala izango du. Guztira, 134 abelburu egongo dira erakusgai eta ekoizle zein artisauen 48 postu jarriko dituzte. Saltokietan, besteak beste, okela, gazta, euskal pastela, gozokiak, liburuak edo bitxiak eskuratu ahal izango dira.
Ganadu eta herri kirolen erakustaldiak –azken hau Oketa Zigoitia herri kirol elkartearen eskutik–, bestalde, Plaza Berrian egingo dira. Beste abelburu batzuen artean, pottokak, ponyak, zamakoak edo latxak nabarmenduko dira. Gainera, zaldi-kaskoez informazioa jasotzeko postu bat jarriko dute.
Ekoizle eta artisauen saltokiak, berriz, pilotalekuan jarriko dituzte; 48 postu jarriko dituzte, horietatik 15 udalerrikoak. Umeentzako jokoak eta ardiak kardatzeko tailerra ere izango dira Udaletxe Plazan. Eta, horrez gain, goiz osoan zehar musika egongo da Urkabustaizko musika eskolaren eskutik; bolo txapelketa izango da; eta artisautza produktuak zozkatuko dituzte.