Statkraft multinazionalak bi parke eoliko eraiki nahi ditu Araban eta Gipuzkoan: hurrenez hurren, Itsaraz eta Piaspe parkeak izango lirateke, Aramaio eta Eskoriatza artean eta Azpeitian kokatzekoak. Statkraftek aurreratu du 2027. urterako jarri nahi dituztela martxan, 90 milioi euro inguruko inbertsioarekin.
Asteartean eman du konpainiak albistearen berri, Iñigo Urkullu lehendakariarekin eta Arantxa Tapia Industria sailburuarekin bildu ostean. Momentuz, Jaurlaritzak ez du gaiaren inguruko aparteko informaziorik eman, bileraren zenbait argazki eta bideo labur bat ez badira. Zabaldutako irudi horietan inprimatutako aurkezpen moduko bat agertzen da mahaian, Desarrollos eólicos en Euskadi tituluarekin.
Enpresak aurreratu du planaren berri diola Azpetiko Udalari; gainerako udal agintariak Jaurlaritzaren informazioaren zain daude momentuz.
Itsarazen kasuan 52,8 megawatteko parkea izango litzateke, eta enpresak ziurtatu du 44.000 etxebizitza hornitzeko gaitasuna izango lukeela. Piasperen kasuan, 33 MW-ko gaitasuna aurreikusi dute, 24.000 etxebizitza inguru hornitzeko.
Multinazionalak babestu du parke horiek "energiaren sozializazioa" eta "zero kilometroko hornidura" ekarriko dituztela. Modu berean, enpresak dio "epe luzerako konpromisoa" eskaini diola Lakuari, eta "hiritarren zein euskal industriaren" parte-hartzea beharrezkoa dela diote. Iberiar penintsulan epe luzerako 50 kon- tratu baino gehiago dituztela esan dute, energia berriztagarriko 1,3 gigawatt eskaintzen dituztenak.