Larunbat gauean, ezezagunek Murgiako Palatu kiroldegian sartu eta kristalezko edalontziak bota dituzte helduen igerilekuaren barruan.
Zuiako Udalak ezagutzera eman duenez, igandean edalontzi horiek jaso eta igerilekuaren hondoa robot batekin errepasatu behar izan dute, erabiltzaileen segurtasuna bermatu ahal izateko. Ondorioz, igandean itxita mantendu behar izan dute instalazioa.
"Era honetako gertaerak ez dira, zoritxarrez, jada isolatuak eta, tamalez, ohiko bihurtu zaizkigu. Berriz ere, jende askok jasan behar izan du gutxi batzuen zentzugabekeria", salatu du udalak, ohar baten bitartez.
Modu berean, udalak "biziki eskertu" du instalazioetan aritzen diren "langileen erantzukizuna eta lana".