Ganaltoko gurutzea eraitsita agertu da

Ganaltoko gurutzea, eraitsita agertu aurretik. / Argazkia: BASOTXERRI (Wikipedia)

Ezezagunek Badaia mendilerroan kokatutako Ganalto mendiko gurutzea bota dute. Hainbat mendizalek eraitsita topatu dute astearte honetan, bere ohiko kokalekutik metro batzuetara.

Gasteiz Hoy hedabideak argitaratu duenez, ezezagun batzuek Ganaltoko (898 metro) gurutzea eraitsi dute, Badaia mendilerroan, Gasteiz eta Gorbeialdea artean, Zuia udalerriko lurretan. Astearte honetan mendian zebiltzan hainbat mendizalek eraitsita topatu dute gurutzea, ohiko kokalekutik metro batzuetara, eta hedabide horri helarazi dizkiote argazkiak. Antza denez, gurutzea lau hanketatik moztu dute erreminta bereziekin; hormigoizko oinarri baten gainean zegoen, burdinaz forjatuta.

Oraingoz ez dago informazio gehiago ekintzaren inguruan, eta ez dira ustezko sabotajearen arrazoiak ezagutzen. Azken urteetan frankismoarekin lotutako hainbat gurutzeren aurkako ekintzak egin dira Euskal Herrian; hala ere, gurutze honek jatorri erlijiosoa duen arren, ez du frankismoarekin lotura zuzenik.

Ordu gutxi batzuetara, Zuiako bizilagun talde batek bere jatorrizko kokalekura igo du gurutzea, poleen eta lur orotako ibilgailuen laguntzarekin.

Ganaltoko lehen gurutzea 1900ean jarri zen, eta egurrezkoa zen. 1954an, Manuel Iradier Txangozale Elkarteak metalezko gurutze bat eraikitzeko eskatu zien Elejalde anaiei. Gaur egungo gurutzea Iñaki Elejalderena da, eta 2003an jarri zuten. Hemeretzi urte beranduago agertu da eraitsita.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide