Igande honetako 10:45ak aldera, Legutioko N-240 errepidean, Gasteizko noranzkoan, furgoneta batek txirrindulari bat harrapatu eta ihes egin du. Handik gutxira, herritarren laguntzari esker, Ertzaintzako agenteek ibilgailua identifikatu eta gidaria topatu dute Amurrion.
Gainera, 30 urteko gizonak positibo eman du alkoholean eta drogetan (anfetaminetan, metanfetaminetan eta opiazeoetan), gidabaimena iraungita zuen eta IATren epea beteta zuen. Ondorioz, bide segurtasunaren aurkako hiru deliturengatik ikertzen ari dira.
Ertzaintzaren patruilez gain, osasun zerbitzuak eta suhiltzaileak bertaratu dira, txirrindularia artatzeko. Arriskuz kanpo zegoen arren, klabikulan min handia eta makadura ugari zituen; hortaz, anbulantzian eraman behar izan dute Txagorritxu ospitalera, klabikula hautsita izan zezakeelakoan.