Ekaina da Zuia Euskaraz egitasmoaren hilabetea. Astez aste, Zuiako euskara taldeak hainbat ekintza antolatzen ditu, eta aurten ekainaren 9an Egun on, Capitan dokumentalaren emanaldiarekin hasi eta 25ean Oroko zelaietako jai egunarekin borobilduko dute egitaraua.
Egun horretan, apirilean egindako 22. Korrikaren (Hitzekin) lekukoa hartuko dute zuiarrek, baita azaroan iritsiko den Euskaraldiaren (Hitzez ekiteko garaia) hirugarren ediziorako beroketa lanak egin ere, bi ekimenen arteko zubia izateko asmoz. Bi ekitaldiek "hitza" eta "ekintza" hitzekin jokatu duten bezalaxe, aurtengo Zuia Euskaraz Egunaren leloa Zuiarrekin! da, "Zuiako herritarrak baitira hitzaren eta ekintzaren arteko lotura-ardatza".
Larunbatekoa egun ederra izango da pandemia atzean utzita berriz ere elkarrekin egoteko eta ondo pasatzeko. Egitaraua 11:00etan hasiko da, Orora Domaikiatik edo Bitorianotik igotzeko aukerarekin. 12:00etan, bertaratutakoei ongi etorria emango diete Oroko zelaietan bertan. 12:30ean, eskalada tailerra haitzetan, trikitilariak, txosnaren irekiera eta parrilladako pintxo dastaketa Atabaka tabernan.
13:00etan izango da ekitaldia, Korrika, Euskaraldia, Zuiako Bertso Eskola eta Murgia institutuko ikasleekin, baita beste sorpresaren bat edo besterekin ere. 14:30ean bazkaltzeko tartea hartuko dute, eta norberaren bazka, aulkiak eta bestelakoak eramatera deitu dute. Azkenik, 16:00etan hasiko da erromeria, Bidean taldearen eskutik.
