Asteartean ezezagunek pintaketa ugari egin zituzten Aramaion: udaletxean, kultur-etxean, Sastiñako baselizan eta baita hainbat pareta pribatutan ere. Covid ziurtagiriaren aurkako pintadak dira, eta udalak "atsekabe handiz" hartu ditu, ohar baten bitartez zabaldu duenez.
Agiriaren arabera, Aramaioko Udala ziurtagiri horren aurka azaldu da, eta "goitik ezarri zaigun kudeaketa eskas honekin kritiko" agertu da ere.
"Osasungintza ez da udal eskumen bat, Covid pasaportea ezartzea udal eskumena ez den moduan", argudiatu dute. Hala izanik ere, udalak dio hasiera hasieratik ahalik eta hobekien saiatu dela herriko eragile ezberdinekin batera pandemiaren kudeaketa egiten, "gure errealitatera egokituz" eta "egunerokoa ahalik eta era bizigarrienean, seguruen eta osasuntsuan garatu ahal izateko malgutasunez".
Modu berean, udalak adierazi du "osasun sistema indartu eta mantendu beharra" behin baino gehiagotan azpimarratu dutela. Halere, pintadak egin dituztenek haien ezinegona herriaren kontra bideratu dutela diote.
"Uste dugu hau egin duten pertsonek edo ez dakitela nola funtzionatzen duen sistemak, edota berdin zaiela gainontzekoei sortzen diguten min eta ezinegona". Udalak dio elkarbizitza "osasuntsu eta orekatu baten alde" lanean jarraituko duela. "Aldarrikatzea zilegi da, noski, baina dagokionari, dagokion moduan eta dagokion lekuan, eta herriari kalte egin gabe", erantsi dute.
Pintaketak (kutreak) egin dituzte herrian. Ez dut uste egileak kontrol sozialaren aurka daudenik, izan ere, esango nuke beraien "askatasun" indibiduala dela gehien axola zaiena. Gainera, benetako militantzia politikoa egiten duten eragileen leloak bereganatzen dituzte. pic.twitter.com/0mNuR3HNin
— Unai Etxenausia (@EtxenausiaUnai) January 11, 2022