Astelehen honetan, 15:00ak aldera, langile batek Ertzaintzari jakinarazi zion Legution egiten ari diren obra batean jaurtigai handi bat izan zitekeena agertu zela. Bertaratu ziren agenteek egiaztatu zuten lehertu gabeko artilleriako jaurtigai bat zela. Berehala, segurtasun dispositibo bat aktibatu zuten, eremua sokaz inguratuz.
Ondoren, Lehergailuak Indargabetzeko Unitateko adituak agertu ziren. Beharrezko ekintzak egin ostean, jaurtigaia Berroziko instalazioetara eraman zuten, bertan kontrolpean leherrarazteko.
Ertzaintzaren unitate berezi horretako adituen arabera, artilleriako jaurtigaia Gerra Zibilekoa zen, eta 155 milimetroko kalibrea, 630 milimetroko luzera eta 44,5 kilogramoko pisua zituen. Gainera, 4.230 gramoko trilitazko karga leherkorra zuen.