Aho batez onartutako 2021-2023 aldirako Diru Laguntzen Plan Estrategikoa udalerrian orain arte gehien garatu den proiektua da, eta 608.800 euroko aurrekontua izango du 2021ean. Aurten lehen aldiz, helburuen artean genero ikuspegia sartu da, eta laguntzak hamar jarduera eremutan banatuko dira: besteak beste, gizarte ekintzaren, kulturaren, hezkuntzaren, kirolaren eta herritarren parte hartzearen sustapena.
Besteak beste, Covid-19aren krisiak eragindako inpaktu ekonomikoa arintzeko laguntzak nabarmendu ditu Udalak. Izan ere, 50.000 euro bideratuko dira familia behartsuenentzat, autonomoentzat eta tokiko enpresentzat.
Beste 53.000 euro bideratuko dituzte zuzeneko diru laguntzen bidez etxebizitza alokatzeko, EITa (Eraikinen Ikuskapen Teknikoa) egiteko eta etxebizitza hutsak birgaitzeko. Partida horren helburua da higiezinak kontserbatzen laguntzea, herritarrak bailaran jarraitzea sustatzea eta gazteen emantzipazioa erraztea.
Diru kopuruari dagokionez, zuzkidura handiena duen eremua udalerriko hamaika kontzejuei dagokiena da. Besteak beste, argiteria publikoa mantentzen laguntzeko, elurra kentzeko gastuak ordaintzeko eta Administrazio Batzarren ekipamendu publikoak hobetzeko lanak egiteko izango da 288.000 euroko partida hori.
"Baliabide publikoen erabilera eraginkorragoa ezarri nahi dugu", azaldu du Unai Gutierrez Urkiza alkateak. "Bereziki, bizikidetza balioak garatzen dituzten, bizi kalitatea hobetzen duten eta herritarren arteko desberdintasun egoerak zuzentzen dituzten politika publikoetara bideratutakoak".