Aramaioko etxe guztiek zuntza izateko aukera bermatu behar dutela gogorarazi die bertako Udalak gai horretan eskumena duten erakunde ezberdinei.
Azaldu du, Europako funtsekin, Espainiako Gobernua, Eusko Jaurlaritza eta Arabako Foru Aldundia udalerrian zuntz optikoa jartzen hasi zirela orain dela bi urte pasatxo. Horrekin lotuta, gaineratu du aipatutako hiru instituzio horiek lehiaketa publiko ezberdinak egin dituztela ingurune ezberdinetan zuntza jartzeko; baina, auzune eta etxe askok oraindik ere zerbitzu hori jaso gabe daudela adierazi du.
Udalak egindako inbentarioan auzune bat baino gehiago duten elizateetan falta da: hain justu ere, Eguzkierripan, Zalgon, Arragan, Errotabarrin, Suñan, Murun, Zabolan, Altzagan, Aldeko-Agarre-Mendakon eta Zubietan. Hauetaz aparte, auzuneetatik urrunen dauden etxe askotan ere ez dela jarri gaineratu du.
Falta diren auzuneei dagokionez, Udalak aipatu du Diputazioak, iazko udaberrian lehiaketa berri bat atera behar zuela, baina Koronabirusarekin ez dakitela noiz aterako duen: "Gainean gaude eta urte batzuk badaramatzagu gai honekin bueltaka, udalaren esku ez egon arren, hasieran esan zuten bezala, etxe guztiek zuntza izateko aukera bermatu behar delako", azpimarratu du.
Etxe sakabanatuei dagokionez, honakoa jakinarazi du: "Ez dakigu oso garbi zer gertatuko den, zonalde ezberdinak markatuta dituzte, diru laguntzak horrela eskatzen duelako, eta izatekotan, etxe hauek azkenak izango dira zuntza izaten".