Urkabustaizko Udalak behin betiko onetsi du 2021erako aurrekontua. Guztira, 1.384.000 euro izango ditu, eta horietako 81.000 euro inbertsioetarako izango dira.
Inbertsioen artean, udaletxearen erreforma integralari ekiteko aurretiazko lanak nabarmentzen dira. Horretarako, udal bulegoak Kultur Etxeko lehen solairuan egongo dira behin-behinekoz. Etorkizunean ekintzailetza eta udalerriko elkarteak sustatzeko erabiliko den espazio hori egokitzeko 160.000 euro erreserbatu dira. Lekualdaketa 2021 urtean zehar egingo da.
Bestalde, Urkabustaizek konpostaje komunitarioko eremuak zabaltzen jarraituko du Izarrako hirigunean. 2020an, banakako 40 konpost-ontzi baino gehiago banatu dira herritarren artean, eta 2021ean ere kanpainari jarraipena emango diote.
Ekitaldi honetan, halaber, pandemiaren eta murrizketen ondorioz joan den urtean garatu gabe gelditu ziren hainbat proiekturekin jarraituko dute: besteak beste, udal pilotalekua berritzeko parte hartzeko prozesua eta iraunkortasun energetikorako proiektuak.
Bestalde, Udalak iragarri du Ostuñoko kirol eremuaren birmoldatzea amaitu egin dela. Beste erakunde batzuek 412.000 euroko obra hori diruz lagundu dute. Igerilekuak eta futbol zelaia hobetzeaz gain, Ostuñoko parkerako sarbideak eta tabernako instalazioak hobetu dira.
Ondasun Higiezinen gaineko Zergaren eta Eraikuntza eta Obren gaineko Zergaren erreformen ondorioz, teilatuak eta fatxadak berritzeagatik hobariak emateaz gain, Administrazio Batzarrek kontzeju bakoitzean jasotzen denaren %10a jasoko dute.
Azkenik, Urkabustaizen aurrekontua Musika Eskolarako beste 134.000 eurorekin osatu dute.