Legutioko espazio okupatuko kideek irailean iragarri zutenez, Desjabetuon Hotela desalojatzeko salaketa aurkeztu du eraikinaren jabe Lerimonte S.L. enpresak. Espazioa husteko agindua hilabeteko epean gauzatu zitekeen, eta, beraz, edozein momentutan iritsi daiteke desalojoa.
Iragan larunbatean, urriaren 17an, ehun pertsona baino gehiago bildu ziren Legution deitutako manifestazioan, Desjabetuon Hotelari "klase elkartasuna" adierazteko desjabetze arriskuaren aurrean.
Mobilizazioa herriko plazan hasi eta herriko kaleetatik igaro zein, gaur egun Desjabetuon Hotela den eraikinaren aurrean amaitu aurretik. Bertan, "klase elkartasuna praktikan jartzeko eta langile kontrolpeko espazioak defendatu ahal izateko mekanismoen sorrera eta mantenua" aldarrikatu zituzten.
Duela hamar hilabete baino gehiago, iragan abenduan, Legutioko mugimendu sozialistak 15 urte hutsik izandako eraikina okupatu zuen, eta, ordutik, "proiektu sozialista indartzeko eta klase elkartasuna antolatzeko" espazioa izan dela azaldu dute. Izan ere, Ikasle Abertzaleak eta Gazte Koordinadora Sozialista erakundeen jarduera garatzeko espazioa izateaz gain, lehen mailako elikagai eta produktuen bankua ere abiatu dute bertan, besteak beste.