Manex Agirre bertsolariak eta Alex Mendikute argazkilariak Begiz jotako koplak liburua aurkeztuko dute ostiral honetan, Aramaioko Sastiñako festibalean. Liburuak ehun argazki inguru bildu ditu, Mendikutek 2010. eta 2017. artean ateratakoak. Denak dira Aramaion eginikoak, eta denetan ageri dira herritarrak; batzuetan bakarka, beste batzuetan lagunduta edo taldean. Agirrek, berriz, argazki horietako bakoitzari bertso bat jarri dio, kasuan kasu neurri ezberdinekoa.
Aramaioko Udalaren webguneari aurreratu diotenez, bertsoak eta argazkiak uztartzeko moduak lan apur bat eskatu du: "Bertsoak idazterako orduan, distantzia jartzea garrantzitsua izan da. Horren ondorioz, pertsonari edo pertsonei buruzkoak baino, irudiei buruzkoak dira egindako bertsoak. Beraz, liburuak bi irakurraldi merezi ditu: lehenengoa, argazkiak ikusteko, eta, ondoren, bertsoez lagunduta, argazkiak berrikusteko. Azken finean, bertsoek argazkiei egindako begirada konkretu bat eskaintzen dute".
Agirrek eta Mendikutek azaldu dutenez, liburua oso oso lokala da: "Argazkietan agertzen direnak ezagutzen dituenak gozatuko du gehien. Hala ere, herritik kanpora ere interes apur bat badu, beso zabalik hartuko dugu…". Aurkezpenaren egunean liburua saldu egingo da, 20 euroan.