Istripu larria izan zen atzo goizean Barazargo mendatean, bi kamioik elkar jo ostean. Ezbeharraren ondorioz, Ollerietako Lur Toki enpresako 73 urteko legutioarrak galdu zuen bizia.
Lan istripu hori zein astea hasi denetik Euskal Autonomia Erkidegoan hil diren beste lau beharginen heriotza salatzeko elkarretaratzea deitu dute bihar, ostirala, ELA, LAB, ESK, Steilas, EHNE eta Hiru sindikatuek, Bilbon. Ohar bateratu batean, elkartasuna adierazi nahi izan diete gidariaren senide eta gertukoei. Horrekin batera, "lan istripuen atzean ezkutatzen den prekarietatea errotik ezabatzeko" eskatu diete arduradun politikoei.
LAB sindikatuaren arabera, dagoeneko hogei lagun hil dira aurten lanean ari zirela.