Langile bat hil da Gorbeia Merkataritza Gunean, Zigoitian, asteazken arratsaldean izandako lan istripu batean. Euskadi Irratiak jaso duen informazioaren arabera, 61 urteko gizona, Zigoitiko bizilaguna, araztegi batera erorita zendu da, merkataritza zentroko hustuketa gunean.
Dei baten bidez ohartarazi dituzte larrialdietako zerbitzuak, 19:10ean, baina bertara hurbildu diren medikuek gizonaren heriotza baieztatu besterik ezin izan dute egin. Osalaneko arduradunak istripua izandako lekura joan dira, gertatutakoa argitzeko asmoz.
Urteko hamabigarrena
LAB sindikatuak azaldu du azken heriotza honekin, hamabi direla gutxienez Hego Euskal Herrian urte hasieratik hildako langileak eta salatu du lan istripu hauek guztiek "prekarietatea" dutela oinarri. "Lan istripuak ez dira kasualitate kontua, bultzatzen diren lan harremanenen, prekarizazioaren, eta lan arautegi eta benetako prebentzio ezaren ondorio zuzenak dira".
Sindikatuak gaineratu duenez, apirilaren 1ean, Ulma Manutencion Kooperatibako langile baten lan heriotza ez traumatikoa jazo zen, Frantzian.